Мўғулистоннинг Hunnu Air авиакомпанияси 2025 йил сентябрида Улан-Батордан Тошкентга илк парвозни амалга оширишни режалаштирмоқда. Бу ҳақда Транспорт вазирлиги матбуот хизмати хабар берди.

Маълум қилинишича, 23 июнь куни Мўғулистон пойтахти Улан-Батор шаҳрида бўлиб ўтган бизнес-форум доирасида транспорт вазири биринчи ўринбосари Маманбий Омаров Hunnu Air авиакомпанияси раҳбари Пуревжав Мунхжаргал билан учрашув ўтказди. Учрашувда томонлар Улан-Батор шаҳридан Тошкентга тўғридан-тўғри авиақатновларни йўлга қўйиш билан боғлиқ масалаларни муҳокама қилди.

Музокара давомида Hunnu Air авиакомпаниясига керакли слотлар ажратилиши масаласига аниқлик киритилиб, транзит йўловчиларга хизмат кўрсатиш механизми ва тартибини мувофиқлаштириш бўйича амалий чора-тадбирлар белгиланди.

Дастлабки маълумотларга кўра, парвозлар Embraer 190 русумли самолётларда амалга оширилади.

Маълумот учун, Hunnu Air — 2011 йилда ташкил этилган бўлиб, штаб-квартираси Улан-Батордаги Чингизхон номидаги халқаро аэропортида жойлашган хусусий авиакомпания ҳисобланади.

• Авиақатнов
• Ўзбекистон
• монголия