АҚШнинг Чикаго шаҳрида Халқаро Бокс федерацияси (IBF)нинг чемпионлар иштирокидаги тадбири бўлиб ўтди.

IBF ташкилоти барча вазн тоифаларидаги чемпионларни бир жойда жамлади. Таклиф этилганлар орасида ўзбекистонлик боксчи Муроджон Аҳмадалиев ҳам бор.

Ўз камарини уч маротаба муваффақиятли ҳимоя қилган чарм қўлқоп устаси чемпионлар гала тадбирида иштирок этди.

IBF Аҳмадалиевга барча камар соҳиблари қатори эсдалик учун чемпионлик узуги совға қилди.

“Таклиф ва совға учун IBF ташкилотига катта раҳмат. Мени эсдалик совғасига муносиб кўришгани учун ташаккур изҳор қиламан.

Тез орада ўз камарларимни қайтариб оламан. Мени ҳамиша, ҳар қандай ҳолатда ҳам қўллаб-қувватлаб келаётган жамоамга миннатдорлик изҳор этаман. Янги чўққиларни забт этиш учун ҳаракатни давом эттирамиз”, – деб фикр билдирган Аҳмадалиев.

• Бокс
• IBF
• Муроджон Аҳмадалиев