Миллиардер Илон Маскнинг шахсий аккаунти “Twitter” ижтимоий тармоғида обуначилар сони бўйича АҚШ собиқ президенти Барак Обаманинг саҳифасини ортда қолдириб, энг кўп ўқилган саҳифага айланди. Бу ҳақда 30 март куни Гиннеснинг рекордлар китоби расмий сайтида хабар берилди.

Илон Маск 44 миллиард долларга платформани сотиб олганидан кейин беш ой ўтиб “Twitter”да энг кўп кузатувчига эга бўлди. 133 миллион ўқувчи билан 51 ёшли технология магнати 2020 йилдан буён рекорд ўрнатган АҚШнинг собиқ президенти Барак Обамани ортда қолдирган.

Гиннеснинг рекордлар китоби маълумотига кўра, ҳар ойда 450 миллионга яқин одам платформадан фойдаланади, уларнинг 30 фоизи айнан Маскнинг саҳифасига обуна бўлган. Бизнесмен 2022 йил октябр ойида “Twitter”ни сотиб олиш бўйича шартнома имзолаганидан бери унинг аккаунтига 23 миллиондан ортиқ фойдаланувчи қўшилган. Ҳар куни 100 мингга яқин одам миллиардерга обуна бўлади.

2022 йил 27 октябрда тадбиркор “Twitter”ни сотиб олиш бўйича 44 миллиард долларлик шартномани ёпди. Шундан сўнг дарҳол компания раҳбариятининг бир қатор аъзоларини, жумладан, бош директор Параг Агравал ва молия директори Нед Сегални ишдан бўшатди. АҚШ Қимматли қоғозлар ва биржалар комиссиясининг маълумотлар базасига жойлаштирилган ҳужжатлардан маълум бўлишича, Маск директорлар кенгашини ҳам тарқатиб юборди ва компаниянинг ягона раҳбари бўлди.

Аввалроқ “Wall Street Journal” нашри ўтган йилнинг декабрь ойида реклама берувчилар ҳамкорлик қилмагани сабабли “Twitter”нинг даромади тахминан 40 фоизга камайгани ҳақида хабар берган эди.