“Имом Мотуридий таваллудининг 1155 йиллигини кенг нишонлаш тўғрисида”ги президент қарори имзоланди.

Унга кўра, 2025 йилда Имом Мотуридий таваллудининг 1155 йиллиги кенг нишонланади.

2025 йил апрель ойида Самарқанд шаҳрида “Мотуридийлик – бағрикенглик, мўътадиллик ва маърифат таълимоти” мавзусида халқаро илмий-амалий анжуман ўтказилади.

Хорижлик тадқиқотчилар ўртасида мотуридийлик таълимоти бўйича илмий танлов ўтказилади, ғолиблар иштирокида Ўзбекистонда маданий-маърифий учрашув ва семинар-тренинглар ташкил этилади.

Имом Мотуридийнинг “Таъвилот ал-Қуръон” ва “Китоб ат-тавҳид” асарлари ва мотуридийлик таълимотига оид манбаларнинг ўзбек ва хорижий тиллардаги илмий-изоҳли академик таржималари нашр этилади.

Имом Мотуридий таваллудининг 1155 йиллигига бағишланган эсдалик сувенирлари муомалага чиқарилади ҳамда почта маркалари, тақвимлар, буюк мутафаккирнинг ҳаёти ва илмий меросини ёритиб берадиган бошқа кўргазмали ахборот воситалари туркуми яратилади.

Имом Мотуридийнинг серқирра ҳаёт йўли ва илмий меросининг бугунги кундаги аҳамиятини очиб берадиган бадиий-публицистик фильм яратилади.

Самарқанд вилоятида Имом Мотуридий ва мотуридийлик таълимоти йўналишида фаолият олиб борган алломаларнинг ҳаёти, илмий ва ижодий меросига бағишланган асарларнинг нодир қўлёзма ва нашр нусхалари ҳамда китоблари кўргазмаси ташкил этилади.

Самарқанд шаҳридаги Абу Мансур Мотуридий мажмуаси қайта таъмирланади ва ободонлаштирилади.

• Президент
• Қарор
• Самарқанд