Самарқанд вилояти Оқдарё туманида 3 киши ис газидан заҳарланиб вафот этди. Бу ҳақда “Миллий” телеканалининг “Миллар” дастурида хабар қилинди.

Ҳодиса 15 октябрь куни Оқдарё тумани “Тараққиёт” маҳалласидаги дала ҳовлида содир бўлган.

“Булар кўчиб келишган. Шанба-якшанба кунлари келиб, бир хабар олиб кетади. Газ трубаси тўлиб қолган эканми, ўғли дод-вой қилди. Кириб ёрдам кўрсатдик. Кеч кирган эканмиз, ҳамма ўлганди… Кирганимизда хона газ ҳиди билан қопланганди”, — деди қўшнилардан бири.

Таъкидланишича, вафот этганларнинг икки нафари вояга етмаган болалар — 4-синф ўқувчиси ва 4 ёшли бола бўлган.
Туман газ таъминоти бўлими ходими Абдулла Кубаевнинг айтишича, воқеа содир бўлган уйга аввал бир неча марта боришган, аммо доим қулф бўлган.

ФВВ Самарқанд вилояти бошқармаси ходими аҳолини ис газидан заҳарланмаслик учун носоз иситиш воситаларидан фойдаланмасликка ва ўрнатиш вақтида диққатли бўлишга ҳамда мўриларини тозалаб туришга чақирди.

Ҳозирда ҳолат бўйича туман прокуратураси томонидан терговга қадар текширув ишлари бошланган.

• Ис гази
• Қурбон
• Самарқанд