Маълумотларга кўра, валюта операцияларини чеклаш қарори қизғин баҳс-мунозараларга сабаб бўлди. Марказий банк раиси Мамаризо Нурмурадов ушбу қарор бекор қилинганини эълон қилар экан “Жамият қабул қилмаган қарор – бу нотўғри қарор”, деди. “Либераллаштиришда ортга қайтиш ҳақида гап бўлиши мумкин эмас”, дея қўшимча қилди у.
Ўзбекистон Марказий банки раиси Мамаризо Нурмурадов шанба куни бўлиб ўтган матбуот анжуманида Марказий банкнинг Банк назорати қўмитаси томонидан бир кун аввал қабул қилинган банклар ва тадбиркорлик субъектлари учун валюта операцияларига чекловлар жорий этиш тўғрисидаги қарори бекор қилинганини маълум қилди.
“Бир кун аввал банк қўмитаси томонидан қабул қилинган қарор қизғин муҳокамаларга сабаб бўлди. Энг муҳими, бу қарор юзасидан ижобий фикрларни кўрмадик”, – деди Марказий банк раҳбари.
“Биз бу қарор бўйича ижобий қарашлар, фикрларни кўрмадик. Фалсафада шундай тушунча бор: жамият қабул қилмаган қарор – бу нотўғри қарор. У қайси мақсадга йўналтирилган бўлишидан қатъи назар, биз худди шу тамойилдан келиб чиқиб, кечаси билан ўтириб, банк қўмитасини тўпладик. Ушбу қарорни бекор қилиш бўйича қўмита қарор қабул қилди”, – деди Нурмурадов.
Марказий банк раисининг қўшимча қилишича, бу қарор орқали тижорат банкларига эҳтимолий хавфнинг олдини олиш учун кўрсатма берилган.
“Марказий банк мустақил, буни таъминлаш керак дейсизлар-у, қарорларни жамият билан муҳокама қилиш кераклигини айтасиз. Жамият билан муҳокама қилинадиган қарорларимиз бор – у алоҳида. Бунда эса бевосита банкнинг фаолиятидаги камчилигини кўрсатиб, тўғрилашни айтяпмиз. Бунинг банк мижозига дахлдор жойи йўқ. Банк назоратни кучли қила олмагани учун, хавф келяпти, шунинг олдини олинг деган маънода банкларга берилган кўрсатма эди”, – деди Нурмуродов.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!