11 апрель куни халқаро бозорда олтин нархи илк бор 3 250 доллардан ошди. Бу ҳолат савдо урушлари ва глобал иқтисодиётдаги босимлар, шунингдек, АҚШ долларининг қадрсизланиши билан боғлиқ.

Comex биржасида июнь ойидаги фьючерслар 2,2 фоизга ошиб, бир унция учун 3 246,2 долларни ташкил этди. Савдолар чоғида эса нарх 3 255,9 долларга етиб, тарихий рекордни янгилади.

Мутахассислар сўзларига кўра, долларнинг заифлашуви олтин нархининг ўсишига сабаб бўлмоқда. DXY индекси 2022 йилдан бери энг паст даражага тушиб, 1 фоизга камайган. Trading Economics бу ҳолатни хорижий инвесторлар ишончининг пасайиши билан изоҳламоқда.

АҚШ ва Хитой ўртасидаги божхона тарифлари бўйича кескинлик глобал инқироз хавфини оширмоқда. Инвесторлар эса хавфсиз актив сифатида олтинга сармоя киритмоқда.

UBS таҳлилчиси Жованни Стауновонинг айтишича, яқин ойларда олтин нархи 3 400–3 500 долларгача етиши мумкин. 2023 йилда 1 900 доллар бўлган нарх, 2025 йил апрелида илк бор 3 250 доллардан ошди.

• Нарх-наво
• Олтин
• рекорд