“Жанубий Корея Конституциявий суди Бош вазир Хан Дак Суга нисбатан импичментни бекор қилиб, унинг мамлакат президенти вазифасини бажарувчи ваколатини тиклади”, – деб ёзди BBC.

Ўтган йил декабрь ойида президент Юн Сок Ёл ҳарбий ҳолат эълон қилишга урингани учун лавозимидан четлатилиб, унга қарши парламент томонидан импичмент эълон қилинган. Шундан сўнг, Хан раҳбар вазифасини бажара бошлаган. Афсуски, ҳокимият тепасида икки ҳафта тургач, қонунчилар унга ҳам импичмент эълон қилиш учун овоз берганди.

Шундан буён Жанубий Кореяни бош вазир ўринбосари Чой Санг-мок бошқариб келаётган эди.

Умуман, Юн ҳарбий ҳолат жорий этган кундан бери ушбу мамлакатда сиёсий тартибсизлик авж олган.

Президент вазифасини бажарувчи масъулиятини зиммасига олганидан кўп ўтмай, Хан Конституциявий судга янги судьялар тайинланиши жараёнига тўсқинлик қилди. Натижада бу сиёсатчи ҳам нишонга олина бошланди. Шунга қарамай, бугун судьялар импичментни бекор қилишди.

“Конституциявий судга оқилона қарори учун миннатдорлик билдираман. Мен ҳукуматни тартибга келтиришга ҳаракат қиламан”, – деган Хан.

• Бош вазир
• Janubiy Koreya
• Президент