Қирғизистон президенти Ўзбекистонга давлат ташрифи билан келади. Бу ҳақда 2024 йил 13 июнь куни Қирғизистон-Ўзбекистон бизнес-форумининг очилишида, Қирғизистон Республикаси иқтисодиёт ва тижорат вазирининг ўринбосари Санжар Болотов маълум қилди.

“Яқин келажакда Қирғизистон Республикаси президенти Садир Жапаровнинг Ўзбекистонга давлат ташрифи режалаштирилган. Икки президентнинг бўлажак учрашуви қўшничилик ва ўзаро манфаатли муносабатларни ривожлантириш бўйича умумий иродани ўзида мужассам этган ҳолда мамлакатларимиз ўртасидаги дўстона алоқаларни мустаҳкамлашда муҳим лаҳза бўлади”, – деган Болотов.

“Президентларимиз мамлакатларимиз ўртасидаги товар айирбошлашни 2 млрд.га етказиш вазифасини олдимизга қўйдилар. Бу амбицияли, аммо амалга ошириладиган мақсад. Ушбу мақсадга эришиш учун биз биргаликда ишлашимиз, мавжуд бўлган барча воситалар ва механизмлардан фойдаланишимиз керак. Ишончим комилки, биргаликдаги саъй-ҳаракатлар билан биз нафақат бу ютуққа эриша оламиз, балки ундан ҳам ошиб кетамиз”, – деган вазир ўринбосари.

2023 йил якунларига кўра, Қирғизистон Республикасининг Ўзбекистон билан товар айланмаси 694,0 млн долларни ташкил этди. Бу эса 2022 йилга нисбатан 15,8 фоизга ошган. Шу жумладан экспорт – 290,8 миллион долларга яъни 22,9 фоизга, импорт 403,2 млн долларга, 11,2 фоизга ўсган.

• Қирғизистон
• Sadir Japarov
• Ташриф