Германиянинг Вайссенхаус шаҳрида бўлиб ўтган Freestyle Chess Grand Slam Tour мусобақаси ўз якунига етди. Ушбу мусобақада сараланган жами 10 нафар шахматчилар иштирок этишди. Улар орасидан Нодирбек Абдусатторов ҳамда Жавоҳир Синдаров ҳам ўрин олган.

Нодирбек Абдусатторов чорак финал баҳсларида собиқ жаҳон чемпиони Магнус Карлсенга мағлуб бўлиб кейинги ўринлар учун курашган бўлса, Жавоҳир Синдаров Ҳикару Накамура устидан ғалаба қозонган ҳолда ярим финалгача етиб борди. Ўзбекистонлик ёш шахматчи ҳамда АҚШлик Фабиано Каруана ўртасида кечган ярим финал баҳсларининг асосий ўйинларида, иккита қўшимча ўйинларда ҳам дуранг натижа қайд этилди. Якунда ғолиб Армагеддон усули орқали аниқланди. Унда қора доналарда ўйнаган Фабиано ғалаба қозониб финал йўлланмасини қўлга киритди. Жавоҳир Синдаров учинчи ўрин учун кечган баҳсда Магнус Карлсенга имкониятни бой берди.

Мусобақа якунида мезбон шахматчи Винсент Кеймар чемпионликни қўлга киритди. Жавоҳир Синдаров 4-ўрин ҳамда 60 минг АҚШ доллари, Нодирбек Абдусатторов 6-ўрин, 40 минг АҚШ доллари миқдоридаги пул мукофотига эга бўлди.

• Nodirbek Abdusattorov
• Ўзбекистон
• Шахмат