Жиззах вилояти Дўстлик туманида 29 ёшли эркак ўзига таниш бўлмаган 23 ёшли аёлни Россияга сотиб юбормоқчи бўлган вақтида қўлга олинган. Бу ҳақда Олий суд матбуот котиби Азиз Обидов маълум қилди.

Хабарга кўра, эркак нотаниш аёлни Россияга фоҳишалик қилиш мақсадида сотиб юбормоқчи бўлганида ушланган. Ушбу ҳолат Жиноят ишлари бўйича Дўстлик тумани судида кўриб чиқилган.

“Айбимга иқрорман ва қилган ишимдан пушаймонман. Оилада ягона боқувчиман. Хотиним ҳомиладор. Бир нафар вояга етмаган фарзандим бор. Суддан енгиллик сўрайман”, – деган судланувчи суд мажлисида.

Жиноят ишлари бўйича Дўстлик тумани суди эркакни Жиноят кодексининг 135-моддаси 1-қисми (Одам савдоси) билан айбдор деб топиб, унга нисбатан 3 йил 6 ой муддатга озодликни чеклаш жазоси тайинланган.

• Жиноят
• Жиззах
• Одам савдоси
• Россия
• Суд