Фермер хўжаликларига қарашли сув насосларни электр тармоғига яширинча улаб, 745,3 млн сўмлик электр энергиясидан ноқонуний фойдаланиш ҳолатлари аниқланди. Бу ҳақда Электр энергияси, нефть маҳсулотлари ва газдан фойдаланишни назорат қилиш инспекцияси маълум қилди.

Унга кўра, “Ўзенергоинспексия” Жиззах вилояти ҳудудий бошқармаси ва Бош прокуратура ҳузуридаги Департамент билан ҳамкорлигида ўтказилган назорат тадбирида Бахмал, Янгиобод ва Пахтакор туманларида фаолият юритувчи “М.Б.”, “Л.М.” ҳамда “У.С.” фермер хўжаликлари тижорат мақсадида сув насосларини электр ҳисоблагичдан ташқари яширин йўллар билан тармоққа уланганликлари аниқлаган.

Ушбу қоидабузарликлар натижасида давлат манфаатларига 745,3 млн сўмлик зарар етказилганлиги маълум бўлган.

Мазкур ҳолатлар юзасидан Жиноят кодексининг 169-моддаси билан жиноят ишлари қўзғатилиб, тергов ҳаракатлари ўтказилмоқда.

• Электр энергияси
• Жиззах