Жиззах вилояти Ғаллаорол туманида Ўзбекистон ҳудудида учрамайдиган питон илони топилди. Бу ҳақида “Ekologuz” Telegram каналида маълум қилинди.

Қайд этилишича, жорий йил 22 март куни “Ғаллаорол тумани Жума бозори тарафда 3 метрли илон чиқди” сарлавҳаси остида ижтимоий тармоқларда хабарлар тарқалган.

Вилоят Экология ва атроф-муҳитни муҳофаза қилиш бошқармаси матбуот хизмати котибининг маълумот беришича, бундай тур илонлар Ўзбекистон ҳудудида учрамайди.

Маълум қилинишича, видео ва суратлардаги питон илони Ғаллаорол тумани Олимлар МФЙ ҳудудидаги очиқ майдонга сел билан оқиб келган ва чўпонлар томонидан топилган. Тарқалган хабарлар юзасидан Ғаллаорол тумани Экология бўлими Ички ишлар бошқармаси билан биргаликда текширув ишлари ўтказмоқда.

“Илон қаерда ва ким томонидан сувга ташлангани ҳақидаги тўлиқ маълумотлар олиниши билан яна қўшимча хабар берилади”, – дейилади хабарда. 

• Экология
• Жиззах
• ilon