Келгуси йилги президентлик сайловларида Жо Байденнинг энг яқин иттифоқчиларидан бири бўлиши керак бўлган штат ва маҳаллий демократик лидерлар унинг иммиграция билан боғлиқ ишини қаттиқ танқид қилмоқда. Президент Байденнинг 2024 йилдаги республикачи рақиби Дональд Трамп иммиграция жараёнларидан фойдаланиб, ўз тарафдорларини кўпайтирмоқда. Вазият бўйича амалдаги президентни жамоатчилик қўллаб-қувватлаши ёмонлашмоқда.

Сайловга ҳали бир йилдан кўп вақт бўлса-да, ўсиб бораётган иммиграция инқирози таъсири АҚШ-Мексика чегарасидан минглаб мил узоқликда сезилмоқда. Чунки республикачи губернаторлар янги келган муҳожирларни Демократлар томонидан бошқариладиган шаҳарларга жўнатмоқда. Бу эса Жо Байденнинг қайта сайланишига сиёсий таъсир кўрсатмасдан қолмаяпти.

Пайшанба куни Байден маъмурияти кескин ўсишни ҳал қилиш учун иккита янги қадамни эълон қилган. Президент АҚШ-Мексика чегараси бўйлаб деворнинг қўшимча қисмларини қуриш учун маблағ ажратган. Президент, шунингдек, АҚШ Венесуэла фуқароларини тўғридан-тўғри депортация қилишни қайта бошлашини айтган.

Маркет университетининг рўйхатга олинган сайловчилари ўртасида ўтказилган янги сўровида респондентлардан иммиграция ва чегара хавфсизлиги масаласида ким “яхшироқ” эканини, амалдаги президентми ёки у алмаштирган одамни танлаш сўралган. Натижага кўра, рўйхатга олинганларнинг 52 фоизи Трампни афзал кўришини айтган, атиги 28 фоизи эса Жо Байденни танлаган.

Чегарадан келаётган безовта қилувчи янгиликлар, шунингдек, муҳожирлар жойлашаётган АҚШнинг йирик шаҳарлари томонидан кўрилган давлат хизматларининг танглиги жамоатчилик фикрида сезиларли из қолдирмоқда. Агар инқироз 2024 йилги умумий сайлов кампанияси иш бошлашидан олдин пасаймаса, президент ўзининг республикачи рақиби Дональд Трампни ноқулай сиёсий шароитда қабул қилиб олади.

• АҚШ
• Байден
• Мексика
• Трамп
• Венесуэла