Маълумотларга кўра, Кения мудофаа бошлиғи ва яна тўққиз нафар юқори лавозимли ходим 18 апрель куни юз берган вертолёт ҳалокати оқибатида ҳалок бўлган. Бу ҳақда “Al Arabia” нашри хабар берди.

Ҳодиса юзасидан Кения президенти Уилям Руто миллий хавфсизлик кенгашининг шошилинч йиғилишини чақирган. Мамлакатда жума кунидан бошлаб уч кунлик мотам эълон қилинди.

Мудофаа кучлари бошлиғи генерал Френсис Омонди Оголла ҳалок бўлгани расман тасдиқланган. Ҳалокат пойтахт Найробидан 400 километр шимоли-ғарбда жойлашган Элгеё Мараквет округида содир бўлган.

“Вертолёт қулагандан кейин аланга олган. Унинг бортида 10 дан ортиқ юқори мартабали қўмондонлар, жумладан генерал Оголла ҳам бор эди”, дейилган расмий баёнотда.

Маълум қилинишича, ҳалок бўлган 61 ёшли вазир Оголла ўтган йилнинг апрель ойида мудофаа кучлари бошлиғи этиб тайинланган. Ҳалокат содир бўлган ҳудудга вазир ва унинг бошқа шериклари махсус миссия билан жўнатилган бўлган.

• Halokat
• Мудофаа
• Vertolyot