Айни кунларда Ўзбекистонда коронавирус билан касалланганлар сони кўпаяётганининг сабаби маълум қилинди. Бу ҳақда АОКАда ўтказилган брифингда Нурмат Отабеков маълум қилди.

Қайд этилишича, 23 ноябрь ҳолатига кўра коронавирус билан касалланганлар сони 245 минг 665 нафарни ташкил этиб, улардан 243 минг 234 нафари (99,1 фоиз) соғайган, 1 637 нафари (0,6 фоиз) вафот этган.

Сўнгги ҳафтада стационарга ётқизилган беморлар сони 482 нафар, даволаниб чиққанлар сони 358 нафар, карантинга олинганлар 2 минг 310 нафар ва карантиндан чиқарилганлар эса 1 306 нафарга етган бўлса, ҳозирда коронавирусни даволашга ихтисослашган шифохоналарда 539 нафар беморлар мавжуд ва уй шароитида даволанаётганлар 187 нафарни ташкил этмоқда.

Сўнгги 14 кунлик таҳлилда касалликнинг тарқалганлик даражаси 2 ни ташкил этмоқда. ЖССТ экспертлари хулосасига кўра бу кўрсаткич 1 гача бўлса, вазият барқарорлигини англатади.

Республикада вирус геномини ўрганиш бўйича ўтказилган сўнги таҳлилларнинг барчасида “омикрон” штаммининг “Stealth-Omicron” БА.5 варианти аниқланган.

Ўзбекистонда ҳам грипп ва ўткир респиратор инфекциялар 2022-2023 йиллар куз-қиш мавсумида коронавирус инфекцияси билан микс-инфекция касаллиги сифатида, айнан эмланмаган аҳоли ҳамда сурункали касалликлари мавжуд бўлган фуқаролар ўртасида қайд этилиши кузатилаётгани таъкидланган.

Шунингдек, эмлаш тадбирлари учун жами 73 млн доза вакцина олиб келинган ва унинг 27,6 млн дозаси Ўзбекистонда ишлаб чиқарилган.

2022 йил 22 ноябрга қадар жами 72,3 млн доза вакцина ишлатилган. Биринчи доза билан эмланиш кўрсаткичи эмланиши режалаштирилган қатламга нисбатан 99,3 фоизни, тўлиқ босқичларда эмланиш кўрсаткичи эса 82,3 фоизни ташкил қилмоқда.

Шунингдек, бустер доза билан эмланганлар – 16,9 млн нафарни (режага нисбатан – 78,9 фоиз) ташкил этмоқда.

• АОКА
• Nurmat Atabekov
• Омикрон
• коронавирус
• саломатлик