Колумбия университети (АҚШ) тадқиқотчилари COVID-19 юрак ҳужайраларининг кальций каналларида ўзгаришларни юзага келтириб, уларни ишдан чиқариши мумкинлигини аниқлади.

Маълум бўлишича, коронавирусга чалинган беморларда инфаркт ва инсультга чалиниш кўрсаткичи 55 фоиз юқори.

Шунингдек, уларда бошқа юрак хасталиклари, хусусан, аритмия (юрак ритми тартиби бузилиши) ва миокардит (юрак мушаклари яллиғланиши) кўпроқ кузатилмоқда.

Шу сабабли тадқиқотчилар COVID-19'ни юқтирган кишиларнинг юрак тўқималарини таҳлил қилиб, яллиғланиш жараёни кучайиши, тромблар шаклланиши, ҳужайралар нобуд бўлиши ва кальций миқдори ўзгариши каби белгиларни кузатишган.

Якунда бунга юракдаги кальций ионлари даражасини назорат қилувчи RyR2 оқсили фаолияти бузилиши сабаб бўлгани хулоса қилинган.

Қайд этилишича, тана ва юрак мушакларининг қисқариши учун кальций ионлари зарур. Бу модда даражаси назорати издан чиқиши аритмия ёки юрак етишмовчилигига олиб келиши мумкин.

Мутахассислар мазкур тадқиқот коронавирусга чалинган беморларда кузатиладиган юрак симптомларини аниқлаш ва даволашда катта натижа беришига ишонч билдиришмоқда.

• COVID-19
• Yurak
• коронавирус
• тадқиқот