Жаҳон соғлиқни сақлаш ташкилотининг иммунизация ва вакцинация масалалари бўйича директори Кейт OʼБраен коронавирусга қарши эмлаш воситалари самарадорлиги ва хавфсизлиги ҳақида баёнот берди.

Унга кўра, COVID-19 профилактикасида қўлланилаётган вакциналар хасталик оғир ўтиши, госпитализация ҳамда ўлим ҳолатларининг олдини олишда ишончли таъсирга эга. Фақат максимал самарадорликка эришиш учун тўлиқ босқичда ва бустер дозада эмланиш зарур.

Бунга, биринчи навбатда, хавф гуруҳига мансуб аҳоли қатлами, яъни:

– 60 ёшдан ошганлар;

– сурункали касалликларга чалинганлар;

– иммунитети заиф беморлар;

– ҳомиладор аёллар;

– тиббиёт ходимлари амал қилишлари керак.

Ўз навбатида, ЖССТ масъули баъзи оммавий ахборот воситаларида бустер доза кекса ёшли кишиларда инсульт хавфини келтириб чиқариши тўғрисидаги хабарлар мутлақо асоссиз эканлигини таъкидлади.

«Ўрганишларимиз давомида мазкур ҳолатлар ўз тасдиғини топмади. Қолаверса, ташкилотга бу борада ҳеч қандай эътироз, шикоят ва шубҳали ҳолатлар бўйича маълумотлар ҳам келиб тушмаган» — дейди эксперт.

• COVID-19
• ЖССТ
• Вакцина