Жорий йилнинг 22 апрель куни инвестициялар, саноат ва савдо вазири Лазиз Қудратовнинг Туркиянинг Ўзбекистондаги Фавқулодда ва Мухтор элчиси Уфук Улуташ билан учрашуви бўлиб ўтди.

Учрашув давомида қайд этилишича, сўнгги беш йил ичида Ўзбекистон ва Туркия ўртасидаги товар айирбошлаш ҳажми 40 фоизга ошди, мамлакатда турк капитали бўлган корхоналар сони эса қарийб икки мингга етди.

Шу билан бирга, минтақавий ҳамкорлик даражаси ва ҳар икки мамлакат иқтисодиётининг салоҳияти савдо-иқтисодий ва инвестицион ҳамкорликни янада ривожлантириш учун фойдаланилмаган муҳим имкониятларни таъкидлайди.

Шуларни инобатга олган ҳолда, томонлар қўшма чоралар кўришга, шу жумладан имтиёзли савдо шартномаси доирасида маҳсулот турларини кенгайтиришга келишиб олдилар. Шунингдек, келгуси йилларда ўзаро савдо ҳажмини 5 миллиард долларгача ошириш мақсадида мувофиқликни баҳолаш бўйича шартнома имзолаш тўғрисида келишувга эришилди.

Ўзбекистондаги ислоҳотларни баҳолаб, элчи Туркия мамлакатда инвесторлар учун ноёб шароит ва имкониятлар яратишга қаратилган ҳаракатларни доимий равишда қўллаб-қувватлаётганини таъкидлади. Шу нуқтаи назардан, инвестиция ҳамкорлигини мустаҳкамлаш ва турк инвесторларини жалб қилиш учун мавжуд бўлган барча саъй-ҳаракатларни фаол равишда сафарбар этишга тайёрлик билдирилди.

Учрашув якунида икки мамлакат ўртасидаги ҳар томонлама стратегик шерикликни янада фаоллаштириш бўйича аниқ йўналишлар белгиланди, бу йил Ўзбекистонга режалаштирилган олий ва юқори даражадаги ташрифларни биргаликда ишлаш ва пухта тайёрлаш, шунингдек, юзага келаётган масалаларни тезкор ҳал этиш учун бевосита ҳамкорлик механизми ишлаб чиқилди.

• Ўзбекистон
• Туркия