2025 йил 25 апрель куни Олмаотада Ўзбекистоннинг туризм салоҳияти тақдимоти бўлиб ўтди. Тадбирда икки мамлакат туризм соҳасининг етакчи вакиллари, дипломатлар, экспертлар ва ишбилармонлар иштирок этиб, туризмни ривожлантириш истиқболлари, ҳамкорликнинг янги йўналишлари ҳамда маданий ва тарихий меросни илгари суриш имкониятларини муҳокама қилдилар.

Ўзбекистоннинг Қозоғистондаги элчиси Бахтиёр Иброҳимов икки давлат ўртасида туризм ҳамкорлигини мустаҳкамлаш муҳимлигини таъкидлаб, Ўзбекистоннинг бой маданий меросини халқаро туризмни ривожлантириш учун асос сифатида қайд этди.

Туризм қўмитаси вакиллари мамлакат минтақаларининг сайёҳлик имкониятлари ҳақида сўзлаб беришди. Инфратузилмани ривожлантириш, ички туризмни қўллаб-қувватлаш ва халқаро бозорга йўналтирилган янги сайёҳлик маҳсулотларига алоҳида эътибор қаратилди.

Меҳмонларга Самарқанд, Бухоро ва Хиванинг дунёга машҳур диққатга сазовор жойлари, шунингдек, замонавий туризм инфратузилмаси объектлари, экологик ва гастрономик туризм имкониятлари ҳақида видео тақдим этилди.

• Ўзбекистон
• Қозоғистон
• Туризм