“Россия болаларни баллистик қуроллар билан ўлдираётганини яшириш нотўғри ва хавфли. Бу Москвадаги разилларнинг урушни давом эттириш ва дипломатияни менсимаслик каби ишларини қўллаб-қувватлайди”, — дейди Зеленский 5 апрель куни кечқурун Кривой Рокка бўлган ҳужумга муносабат билдирар экан.

Россиянинг ракета ва дронлар ҳужуми оқибатида 18 киши, жумладан тўққиз нафар бола ҳалок бўлди. Маълум қилинишича, жабрланганлар сони 74 кишига етган. Уларнинг 37 нафари, шу жумладан беш нафар бола шифохоналарда даволанмоқда. Кейинроқ яна бир киши айни ҳудудга уюштирилган дрон ҳужумидан ҳалок бўлган.

Ҳужум содир бўлган кунда Зеленский шифохонада 3 ёшли бола вафот этгани ҳақидаги хабарни ижтимоий тармоқларга жойлаштирган эди. У ҳалок бўлган болаларнинг исмларини санаб ўтиб, турли давлатлар, жумладан, Германияга “принципиал позицияси учун” миннатдорчилик билдирди. Аммо, АҚШ элчихонасининг муносабати “ҳайратда қолдираётганини” таъкидлади. “Шунчалик кучли мамлакат ушбу ҳолатларга шу даражада совуққон муносабатда бўлаётганини кўриб ҳайрон қоляпмиз. Болаларни ўлимига сабаб бўлган ракеталар ҳақида гапиришганда ҳатто “Россия” сўзини ишлатишдан қўрқишяпти”, — деб ёзади Украина раҳбари.

• Болалар
• Havo hujumi
• Raketa
• Россия
• Украина
• Уруш
• Зеленский