Канада Бош вазири Марк Карни 1 ноябрь куни АҚШ Президенти Доналд Трампдан тарифларга қарши сиёсий реклама учун узр сўраганини ва Онтарио бош вазири Даг Фордга уни намойиш қилмасликни айтганини маълум қилди.

Жанубий Кореяда бўлиб ўтган Осиё – Тинч океани саммитида қатнашганидан кейин журналистлар билан суҳбатлашган Карни, 29 октябрь куни Жанубий Корея Президенти томонидан уюштирилган кечки овқатда Трампдан шахсий равишда узр сўраганини айтди. Шунингдек у: “Мен Фордга рекламани давом эттиришни хоҳламаслигимни айтдим”, – дея рекламани Форд билан эфирга узатишдан олдин кўриб чиққанини, аммо ундан фойдаланишга қарши бўлганини таъкидлаган.

Шу ҳафта бошида Жанубий Кореядан жўнаб кетаётганда, Трамп ўша кечки овқатда Карни билан “жуда ёқимли” суҳбатлашганини маълум қилди, аммо бу ҳақда батафсил маълумот бермади. 31 октябрь куни Трамп ҳали ҳам Қўшма Штатлар ва Канада савдо музокараларини қайта бошламаслигини билдирган.

Эслатиб ўтамиз, АҚШ президенти Доналд Трамп Канаданинг Онтарио провинцияси ҳукумати томонидан эълон қилинган реклама сабаб Канада товарларига нисбатан божларни қўшимча 10 фоизга оширган эди.

• АҚШ
• Бош вазир
• Канада
• Трамп