Хитойлик планетологлар “Чжунжун” марсоходи Марс сайёрасида тахминан 3,5 миллиард йил олдин улкан океан бўлганини тасдиқловчи асосли далиллар топгани ҳақида хабар берди.

Марсоход сайёрадаги “Утопия” текисликларига 2021 йилда қўнган ва кейинги йилнинг майидан бошлаб ишга тушганди. Қурилма Марсдаги қиш мавсумида гибернация режимига ўтганди. Янги мавсум бошланиши билан марсоход кутилмаганда ишламай қолди.

Муҳандислар қурилманинг қуёш панеллари қум билан қоплангани ва бу уларнинг қувватланишига халақит берган бўлиши мумкинлигини тахмин қилмоқда. Тадқиқотчилар марсоходнинг бир йиллик фаолияти давомида олинган маълумотларни ўрганишда давом этмоқда. Маълумотлар таҳлили қарийб 3,5 миллиард йил олдин Марснинг шимолий яримшарини катта қисми улкан денгиз билан қопланганини тахмин қилиш имконини бермоқда.

Тадқиқотчилар марсоход қўнган “Утопия” текислиги юзасини ўрганиш асосида шундай хулосага келган. Хусусан, тадқиқотчилар чуқурсимон конусларга дуч келган, улар лой вулқонлари натижасида шаклланган бўлиши мумкин. Бу сайёра юзасидан сув бўлганини билдиради.

Бундан ташқари, марсоход чўкиндиларга хос бўлган қатламли тузилмаларни ҳам топган.Олимлар Марснинг қадимий океани тарихини тахминан қайта тиклаб кўрди. Уларнинг баҳолашича, “Утопия” текисликлари 3,68 миллиард йил олдин сув остида бўлган. Охирги 230 миллион йилда океан юзаси секин-аста музлаган ва сувлар қуриб кетган.

• Lifestyle
• Mars
• Okean
• Хитой
• топилма