2025 йил апрель ойида Осака шаҳрида бўлиб ўтадиган Бутунжаҳон кўргазмасида инсонлар фойдаланиши учун мўлжалланган кир ювиш машинаси — human washing machine ускунаси намойиши бўлади, бу ҳақида Lifehacker.ru хабар берди.

Бу махсус ваннани душ тизимларини ишлаб чиқаришга ихтисослашган Science Co компанияси томонидан ихтиро қилинган.

Science Co директори Ясуаки Аояма сўзларига кўра, “ювинтириш жараёни” ўртача 15 дақиқа давом этади. Фойдаланувчи реактив самолёт кабинасини эслатадиган шаффоф капсулага ўтиради. Махсус тизим капсулани илиқ сув билан тўлдиради, сенсорлар қулай ҳароратни таъминлаш учун юрак уриш тезлиги ва бошқа кўрсаткичларни ўлчайди. Сунъий интеллект эса фойдаланувчининг ҳолатини таҳлил қилади ва машинадаги одамнинг дам олиши учун тинчлантирувчи тасвирларни экранда намойиш қилади.

UltrasonicBath деб номланган қурилманинг биринчи версияси 50 йил аввал Sanyo Electric (ҳозирги Панасониc) томонидан тақдим этилган. У танани уқалаш учун ультратовуш тўлқинлари ва митти пластик тўплардан фойдаланган. Бироқ лойиҳа тижорий муваффақиятга эришмаган.

1970 йилда болалигида кўргазмани ўз кўзи билан кўрган ва бундан таъсирланган Ясуаки Аояма лойиҳани қайта йўлга қўйишга қарор қилган. Эндиликда, ванналар ва душ тизимларини ишлаб чиқариш бўйича замонавий технологиялар туфайли компания унинг орзусини рўёбга чиқаришга муваффақ бўлди.

Мираи Нинген Сентакуки (“Инсонлар учун келажак кир ювиш машинаси”) деб номланган ускуна Осака соғлиқни сақлаш павилёнига ўрнатилади. Кўргазмага ташриф буюрувчилар уни синовдан ўтказишлари мумкин. Яқин келажакда мазкур машинадан уй шароитида фойдаланиш учун ишлаб чиқариш режалаштирилган. Кўргазма давомида ташриф буюрувчилар кунига 7-8 марта “кир машинаси”дан фойдаланиши мумкин бўлади. Жами мингта сеанс бўлиши белгиланган.

• Маиший техника
• Япония
• ихтиро
• mashinasozlik
• қизиқарли
• технология