ДХХ Тошкент вилояти бўйича бошқармаси ҳамда божхона идоралари ходимлари ҳамкорлигида Ўзбекистондан Қозоғистон Республикаси ҳудудига нақд пул кўринишида хорижий валюта қимматликларини ноқонуний тарзда “ташмачи” фуқаролар ёрдамида божхона чегараси орқали олиб чиқиб кетилиши олди олинди.

Тошкент тумани ҳудудида ўтказилган тезкор тадбирда гуруҳ етакчиси – 1995 йилда туғилган шахс жами 5 млн 622 минг Россия рублини кичик партияларга бўлган ҳолда Қозоғистонга ўтказиб бериши учун ушбу маблағни “ташмачи” шахсга берган вақтида ашёвий далиллар билан ушланган.

Шундан сўнг тезкор тадбир давом эттирилиб, гуруҳ етакчисининг автотранспорт воситаси ҳамда яшаш хонадонидан жами 11 минг 220 АҚШ доллари, шунингдек, мазкур пул маблағининг асл эгалари қайд этилган дафтар процессуал тартибда ҳужжатлаштириб олинган.

Ҳозирда ушбу шахсга  нисбатан ЖКнинг 25,182-моддаси 2-қисми “а” банди билан жиноят иши қўзғатилиб, “қамоқ” эҳтиёт чораси қўлланилиб, тергов ҳаракатлари олиб борилмоқда.

• ДХХ
• Qoidabuzarlik
• Қозоғистон
• Toshkent viloyati
• Валюта