Россия Хавфсизлик кенгаши раиси ўринбосари ва собиқ мамлакат президенти Дмитрий Медведев “VКоntakte” ижтимоий тармоғида пост ёзиб, Қозоғистон ва Грузия Россия империяси шарофати билан ҳозирда мавжуд эканини таъкидлади.

Журналист ва сиёсатчи Ксения Собчак фикрича, Медведевнинг аккаунти хакерлар ҳужумига учраган, чунки пост бир неча дақиқадан кейин ўчириб ташланган.

Медведев бу постни ростдан ёзганми ёки унинг саҳифасини бузишганми, номаълум. Россия Федерасияси Хавфсизлик Кенгаши раҳбари ўринбосари бу ҳақда ҳозирча изоҳ бермаган.

Шундай бўлишига қарамай, кўпчилик постни скриншот қилиб олишга улгурди. Унда айтилишича, Грузия Россия Империяси шарофати билан ҳозирги чегараларига эга бўлган. У Россия империясига киргунига қадар умуман мавжуд бўлмаган, деб ҳисоблайди сиёсатчи.

Шунингдек, Медведовнинг постида ёзилишича, қачонлардир катта ва қудратли Совет иттифоқи таркибида бўлган барча халқлар яна руслар бошчилигида биргаликда аҳил яшашади. Бунинг учун Россия қўлидан келган барча ишни қилишга тайёр.

“90 йилларнинг бошларида содир этилган ҳалокатли хато тузатилишига, энди ҳеч қачон суверенитет парадлари бўлмаслигига ва бир вақтлар буюк ва қудратли Совет Иттифоқида яшаган барча халқлар яна руслар бошчилигида биргаликда аҳил яшашига ҳеч ким шубҳа қилмаслиги керак. Бунинг учун эса на кучимизни, на воситаларимизни аямаймиз. Ва биз аллақачон бу йўлда ҳаракат қилишни бошладик”– дейилади постда.

Сиёсатчига кўра, Киев эгаллангач, Россия ўзининг янги кампаниясини бошлайди ва мамлакат аввалгидек ҳеч қаерда тугамайдиган чегараларини қайтариб олади.

“Киев ва Кичик Россиянинг барча ҳудудлари улар томонидан ўйлаб топилган украинчиликни тарғиб қилувчи “миллатчилар тўдалари”дан озод қилингандан сўнг, Россия яна минг йил аввал Эски Россия давлати давридагидек бирлашган, қудратли ва енгилмас бўлиб қолади. Шундан сўнг, биз Москванинг ягона қўли остида, славян халқи бошчилигида, сиз билганингиздек, ҳеч қаерда тугамайдиган Ватанимиз чегараларини тиклаш бўйича навбатдаги кампанияга борамиз. Биздан тортиб олинган барча ерлар аждодлар қони билан суғорилган ва асрлар давомида кўплаб жангларда забт этилган. Ва биз уларни ҳеч кимга бермаймиз”,– деб ёзилади Медведовнинг постида.

Унга кўра Грузия Россия таркибига киришдан олдин умуман мавжуд бўлмаган. Ҳозирги чегараларига эса, фақат Россия империяси доирасида эришган.

“Масалан, Грузия қўшиб олинишидан олдин у умуман йўқ эди. 1801 йилга келиб, ҳозирги Грузия ҳудуди бешта суверен сиёсий субъэктдан иборат эди ҳолос. У Россия шарофати билан ҳозирги чегараларига эга бўлди”,– дейилади унинг постида.

Медведовнинг саҳифасига жойлаштирилган постга кўра, Грузия Россияга яқинлашди, “чунки у Москва гўёки мусулмон давлатлари ўртасида “душманлик муҳити”да ўзининг ягона иттифоқчиси эканини тушунган. Ҳозир эса худди шу воқеа такрорланмоқда. Шимолий ва Жанубий Осетия, Абхазия ва Грузиянинг қолган ҳудуди фақат Россия билан ягона давлатнинг бир қисми сифатида бирлаштирилиши мумкин”.

Яъна у постининг охирида Қозоғистон ҳақида ҳам тўхталиб ўтган ва уни сунъий давлат деб атаган.

“Тарихдан яна бир мисол, ХVII аср бошларида Шимолий Қозоғистоннинг ёввойи ерларида руслар биринчи аҳоли пунктларига асос солган. Уч аср давомида бу ҳудудни руслар томонидан мустамлака қилиш жараёни давом этди, бунинг учун Сибир темир йўлининг очилиши ва Столйпин аграр ислоҳоти алоҳида туртки бўлди. Совет Иттифоқи парчаланишидан олдин Шимолий Қозоғистон аҳолисининг 62,5 фоизи славянлар эди. Қозоғистон сунъий давлат, собиқ Россия ҳудудлари, масалан, Гурев, Семипалатинск, ҳатто Олма-Ота шаҳарлари 1924 йилгача Верний деб номланган. Жорий асрда Қозоғистон ҳукумати русларнинг геноциди сифатида баҳоланиши мумкин бўлган турли этник гуруҳларни республикага жойлаштириш бўйича ташаббусларни амалга ошира бошлади. Биз эса бунга кўз юммоқчи эмасмиз. Руслар у ерга келмагунча, тартиб бўлмайди”– деб тугалланган пост.

• Грузия
• Medvedev
• Қозоғистон
• Россия
• СССР