Филаделфияда Доналд Трамп ва Камала Харрис ўртасидаги биринчи теледебат бўлиб ўтди.

Мазкур дебат танаффуслар билан 90 дақиқа давом этди. Залда томошабинлар йўқ, номзодлар бир-бирларига савол бера олишмади, муҳокамани ABC телеканали бошловчилари олиб боришди.

Бугунгача Трамп ва Харрис шахсан учрашмаган эди. Номзодларнинг нутқи давомида ҳар бир саволга жавоб бериши учун икки дақиқа вақт берилди, бу вақтда рақибнинг микрофони ўчириб қўйилди.

Номзодлар теледебатда қуйидагича фикрларни айтиб ўтишди.

Камала Харрис:
— Трампнинг “америкаликлар келажаги” учун ҳеч қандай тайинли режаси йўқ, унинг иқтисодий режаси мамлакатдаги вазиятни ёмонлаштиради;

— Трамп Американи Хитойга “сотди”. Унинг президентлик давридан ёмон соғлиқни сақлаш тизими ва иқтисоди абгор бўлган мамлакат қолди;

— Трамп маъмурияти Америка тарихидаги энг юқори савдо камомадига сабаб бўлди. У бемани савдо урушларини олиб борган;

— Қўшма Штатлар Хитой билан технологик пойгада ғалаба қозониши ва чип ишлаб чиқаришни кўпайтириши керак;

— Агар Трамп президент бўлганида, Путин аллақачон Киевда ўтирган бўларди.

— Трампнинг президентлиги даврида АҚШ демократияси фуқаролар уруши давридан бери энг ёмон ҳолатда бўлган;

— Трамп савдо урушларининг бошланишига ҳисса қўшган;

— Агар мен президентликка сайлансам, АҚШнинг нефть импортига қарамлигини камайтиришни режалаштиряпман.

Доналд Трамп:
— Мен уруш тугашини хоҳлайман. Бунинг учун Россия ва Украина президентлари билан шахсан гаплашаман. Мен музокара ўтказиш учун уларни бир жойга йиғаман;

— Агар мен сайловда ғалаба қозонсам, хорижий маҳсулотларга катта божлар киритишни режалаштиряпман;

— Жо Байден Украинадаги можарони ҳал қилиш учун Россия билан алоқа каналларига эга бўлмаган;

— Демократик партия маъмурияти Қўшма Штатларни учинчи жаҳон уруши томон бошлаши мумкин.

Сўровнома натижаларига кўра, номзодлар ҳозирда тахминан бир хил рейтингга эга, шунинг учун бугунги дебат сайлов натижаларига ҳал қилувчи таъсир кўрсатиши мумкин.

• АҚШ
• Трамп
• saylov