5 март куни вафот этган машҳур вайнер ўлими бўйича ўрганишнинг дастлабки натижалари очиқланди. Соғлиқни сақлаш вазирлиги бошқарма бошлиғи Жалолиддин Асомиддиновнинг маълум қилишича, ўтказилган лаборатор таҳлиллар ва МСКТ текширувларидан сўнг унда бурун тўсиғининг қийшайиши, гаймор бўлиқлари гиперплазияси, ўрта ва пастки бурун чиғаноқлари гиперплазияси аниқланган.

Шундан сўнг беморнинг розилиги билан унда тегишли жарроҳлик амалиёти ўтказилган. Фуқарога риносептопластика амалиёти учун эндотрахеал наркоз берилган. Бироқ операция даврида марҳумнинг аҳволи тўсатдан ёмонлашган. Олиб борилган интенсив ва реанимацион даво чораларига қарамасдан жорий йил 5 март куни соат 03:22 лар чамаси унда биологик ўлим қайд этилган.

Асомиддиновга кўра, айни пайтда текширувлар олиб борилаётгани сабабли “Star Med Center” клиникаси фаолияти вақтинча тўхтатилган. Шунингдек, Соғлиқни сақлаш вазирлиги тегишли органлар билан биргаликда фуқаро Фарҳод Маннопов вафоти юзасидан белгиланган тартибда ўрганиш ишлари олиб бормоқда.

Эслатиб ўтиш мумкин, бир неча кун аввал “Митти вайн” тахаллуси билан ижод қилган блогер Фарҳод Маннопов чўмилаётганда бошини бассейн деворига уриб олиб, бурни синган, шундан сўнг операция столига ётган ва оқибатда комага тушиб қолиб, вафот этган эди.

6 март куни унинг вафоти юзасидан Жиноят кодексининг 116-моддаси (Касб юзасидан ўз вазифаларини лозим даражада бажармаслик) тегишли бандлари билан жиноят иши очилгани маълум қилинган.

• Mittivine
• O'lim