2023 йил учун физиология ёки тиббиёт бўйича Нобель мукофоти Пенсилвания университети (АҚШ)дан Дрю Вайсман ва Каталин Карикога берилди, уларнинг ишлари коронавирусга қарши mRNK вакциналарини яратишга асос бўлган. Бу ҳақда 2 октябрь, душанба куни Швеция пойтахтида ушбу мукофотни топширувчи Стокгольмдаги қироллик Каролина тиббий-жарроҳлик институти маълум қилди.

mRNK COVID вакцинаси ҳозир бутун дунё бўйлаб миллионлаб одамларга уларни жиддий COVID -19’дан ҳимоя қилмоқда. Қолаверса, mRNK технологияси бошқа касалликлар, жумладан, саратон учун ҳам тадқиқ қилинмоқда.

Нобель мукофоти қўмитасининг таъкидлашича, “лауреатлар замонавий даврда инсон саломатлиги учун энг катта таҳдидлардан бири бўлган даврда вакцинани ишлаб чиқишнинг мисли кўринмаган тезлигига ҳисса қўшдилар”.

Тиббиёт ва физиология бўйича мукофот анъанавий тарзда Нобель ҳафталигини очиб берди. Бугун, 3 октябрь куни физика бўйича, 4 октябрда кимё, 5 октябрда адабиёт, 6 октябрь куни Ослода тинчлик бўйича Нобель мукофоти лауреатлари номи эълон қилинади.

Швеция банки томонидан 1968 йилда таъсис этилган Алфред Нобель мукофотининг иқтисод бўйича совриндори номи 9 октябрь куни эълон қилиниши режалаштирилган.
Тиббиёт бўйича Нобель мукофоти жами 113 марта берилган бўлиб, 2022 йилгача 225 нафар ғолиб аниқланган.

Швециялик биолог Сванте Пабо 2022 йилги тиббиёт бўйича Нобель мукофотига сазовор бўлди. У йўқ бўлиб кетган гоминидлар геноми ва инсон эволюцияси соҳасидаги кашфиётлари учун лауреатга айланди.

2021 йилда америкалик тадқиқотчилар Девид Жулиус ва Ардем Патапутян физиология ёки тиббиёт бўйича Нобель мукофотига сазовор бўлди. Улар инсон танасининг ҳарорат ва тегинишни ҳис қилишига имкон берувчи рецепторларни кашф этгани учун мукофотни олди. 2020 йилда гепатит C вирусини аниқлашга катта ҳисса қўшган америкалик вирусологлар Харви Олтер, Чарлз Райс ва британиялик Майкл Хаутон мукофот ғолиблари бўлди.

• Мукофот
• Нобел
• Швеция