Белгиланган товон пули миқдорига кўра муаллифлик ҳуқуқини бузган санъаткорлар рейтинги эълон қилинди. Бу ҳақда Интеллектуал мулк агентлиги хабар берди.

5. Жалолиддин Аҳмадалиев

Жалолиддин Аҳмадалиев шоир Беҳзод Фазлиддинга тегишли “Кутмаган кунларим, кутган кунларим” тўпламига кирган “Балосиз – гўёки ғамимни ейсиз” деб бошланувчи шеъридан муаллифнинг рухсатисиз фойдаланган. Фуқаролик ишлари бўйича суднинг қарорига кўра, хонандага жами 26 млн. сўм товон пулини шоирга тўлаб бериш ва “Айёр дўстларим” номли қўшиқни ижтимоий тармоқлардан олиб ташлаш мажбурияти юклатилган.

4. Достон Эргашев

Достон Эргашев қўшиқчи Ўктам Алиевга тегишли “Ўйламадим” қўшиғидан ҳуқуқ эгасининг рухсатисиз фойдаланган. Узоқ муддатли келишмовчиликлардан сўнг ушбу санъат вакиллари ўзаро келишувга эришган. Унга мувофиқ “Ўйламадим” қўшиғи муаллифи Ўктам Алиев хонандага нисбатан 500 миллион сўм миқдоридаги моддий ва маънавий зарарни ундириш юзасидан судга киритган аризасини қайтариб олган.

3. Санжэй (Санжар Жавбердиев)

Санжар Жавбердиев шоир Усмон Азимга тегишли “Карвон” шеъридан ноқонуний фойдалангани сабабли шоир Усмон Азимга 90 миллион сўмдан ортиқ товон пули ундирилиши ҳақида суднинг қарори чиққан.

2. Фарҳод ва Ширин жуфтлиги

Фарҳод ва Ширин шоир Бобур Бобомуроднинг шеърий асарларига нисбатан муаллифлик ҳуқуқлари бузилгани юзасидан суд иши кўрилган ва шоир ҳисобига 130 миллион сўм товон пули ундириш ҳақидаги суд қарори эълон қилинган.

1. Юлдуз Усмонова

Юлдуз Усмонова шоир Йўлчи Рўзиев тегишли “Хаста бўлма” шеърини ҳуқуқ эгасининг рухсатисиз ноқонуний фойдаланилганлиги сабабли суднинг қарорига кўра даъвогар Йўлчи Рўзиев фойдасига умумий миқдорда 185 миллион сўм ундириш белгиланган.

“Ҳурматли ижод вакиллари, Сизнинг ҳам муаллифлик ва турдош ҳуқуқларингиз бузилаётган бўлса, ҳеч тортинмасдан муаллифлик ҳуқуқларингизни ҳимоя қилиш учун Адлия вазирлиги Муаллифлик ва турдош ҳуқуқлар бошқармасига мурожаат қилишингиз сўралади”, – дейилади хабарда.

• Intellektual mulk agentligi
• Мусиқа
• Санъат