Ижтимоий тармоқларда гиёҳвандлик моддаларини тарқатиш билан шуғулланганлар номаълум шахслар томонидан калтакланиб, уларга тан жароҳати етказилгани акс этган видеолавҳалар тарқалган эди.

Тошкент вилояти ИИББ ходимлари томонидан олиб борилган тезкор тадбирлар давомида жиноятга алоқадор ўндан ортиқ шахслар ушланган.

Қайд этилишича, жорий йилнинг 22 январь куни Қибрай тумани ҳудудида (Телеграм-бот орқали топшириқ олиб, гиёҳвандлик моддаларини тарқатиш билан шуғулланган)ларни номаълум шахслар уриб, уларга тан жароҳати етказишган ва ушбу ҳолат видео тасвирга олинган.

Мазкур ҳолат юзасидан ИИББ ва бошқа ҳамкорликдаги органлар томонидан ўтказилган тезкор тадбирда 1997–2003 йилда туғилган ўндан ортиқ шахслар гумонланувчи сифатида ушланган.

Уларга нисбатан «қамоқ» эҳтиёт чораси қўлланган ва жиноят иши қўзғатилиб, тергов ҳаракатларига киришилган.

Дастлабки терговда аниқланишича, гумонланувчилар маълум моддий манфаат эвазига шу каби бир нечта воқеада иштирок этиб, тан жароҳати етказиш ҳолати акс эттирилган видео ёзувларни ижтимоий тармоқ орқали буюртмачига етказиб беришган.

Келтирилишича, ҳолат юзасидан маълумотлар тўлдирилиб, батафсил ахборот берилади.

• Гиёҳвандлик
• ИИББ
• Самосуд
• Toshkent viloyati