Навоий вилоятидаги “Жонгелди” уран конини ўзлаштиришнинг биринчи босқичида 214 миллион доллар сармоя киритиш режалаштирилган. Бу ҳақда “Навоиюран” давлат корхонаси хабар бермоқда.

Компания маълумотларига кўра, уч йил ичида саноат уран қазиб олиш йўлга қўйилади ва ўртача йиллик ишлаб чиқариш ҳажми 500 тоннани ташкил этади.

Лойиҳани амалга ошириш учун Парижда француз компанияси Орано Мининг, Япониянинг Itochu корпорацияси ва “Навоиюран” ДК ўртасида уч томонлама битим имзоланди.

Ҳужжатда уран ишлаб чиқаришни 2025 йил охиригача ишга тушириш, шунингдек, бошқа қўшма ташаббуслар доирасида геология-қидирув ишларини фаоллаштириш назарда тутилган.

Шартнома шартларига кўра, лойиҳанинг асосий инвесторлари хорижий компаниялар бўлади, бошқарувчи оператор эса “Навоиюран” ДК томонидан тайинланади. Бу ишлаб чиқариш таннархини пасайтиради ва жараённи Ўзбекистоннинг мавжуд ишлаб чиқариш инфратузилмасига интеграция қилади.

• Инвестиция
• Навоий
• Uran