Электр энергияси ва табиий газдан ноқонуний фойдаланган МЧЖ раҳбари маълум бўлди. Бу ҳақда Иқтисодий жиноятларга қарши курашиш департаменти хабар берди.

Қайд этилишича, Департаментнинг Навоий шаҳар бўлими томонидан ИИБ, “Ўзэнергоинспекция” ва “Ҳудудгаз Навоий” ГТФ ходимлари билан ҳамкорликда терговга қадар текширув ўтказилган.

Унда “N-C.” МЧЖ раҳбари Ф.А. Кармана тумани “Янгиариқ” МФЙ ҳудудида жойлашган нотурар жой объектида қум таркибидан қимматбаҳо металларни ажратиб олиш фаолияти билан шуғулланиб келганлиги аниқланган.

У ушбу нотурар бинони ҳамда табиий газни кучайтириб берувчи электр насосни тижорат мақсадида умумий фойдаланишдаги электр энергияси ва газ тармоқларига улаган. Натижада, жами 478,5 млн сўмлик табиий ресурсларни ўғирлаганлиги маълум бўлган.

Мазкур ҳолат юзасидан Жиноят кодексининг 169-моддаси (ўғрилик) билан жиноят иши қўзғатилиб, тергов ҳаракатлари ўтказилмоқда.

• Электр энергияси
• Газ
• Жиноят
• O'g'irlik