Франция президенти Эммануэл Макрон 1 октябрь куни берган интервьюсида Европанинг Россияга бўлган муносабатини танқид қилди. У Россияни Европа учун энг катта структурал таҳдид деб атади ва Европа давлатлари унга нисбатан аниқ ва бирдам жавоб бермаётганини айтди.

Макроннинг таъкидлашича, Россия киберҳужумлар уюштириши, мухолифат вакилларини ўлдиришга уринишлари ва миграция оқимларини бошқариш орқали Европанинг умумий хавфсизлигига таҳдид солмоқда. Шунингдек, Россия фейк янгиликлар тарқатиб, Европа жамоатчилигининг фикрига таъсир кўрсатишда муваффақиятли бўлмоқда, бу эса Европа давлатларини ахборот урушида заифлаштиради.

Франция президенти Европанинг Россиянинг рақамли “бот”лари орқали олиб бораётган маълумот манипуляциясини ҳали тўлиқ тушунмаганини таъкидлади. У айтганидек, агар Россия қирувчи самолёти рухсатсиз Европа ҳудудига кирса, бунга аниқ ва қатъий жавоб берилиши керак. У “стратегик ноаниқлик доктринасини” илгари суриб, ҳар қандай ҳолат учун тайёр туриш зарурлигини билдирди.

Макрон, шунингдек, Украина ва Ғарб иттифоқчиларини Москвага қарши қатъий позицияни кучайтиришга чақирди. У Путин устидан босимни сусайтирмаслик кераклигини, заифлик кўрсатиш ярамаслигини таъкидлади.

• Fransiya
• Макрон
• Россия
• Украина