Мурожаатни гуруҳнинг амалдаги раҳбари Наим Қосим 2024 йилда 20 сентябрда Исроил томонидан “Ҳизбуллоҳ”нинг собиқ ҳарбий қўмондони Иброҳим Ақил ва бошқа раҳбарлари ўлдирилганининг бир йиллигига бағишланган телемурожаатда айтиб ўтган.

Наим Қосим Саудия Арабистони билан мулоқот учун ўзаро низолар ва хавотирларни ҳал қилиш, Исроилни қаршилик эмас, балки душман сифатида тан олиш, шунингдек, Исроилга қарши туришга эътибор қаратиш учун ўтган келишмовчиликларни ҳозирча музлатиб қўйишни таклиф қилган.

“Ҳизбуллоҳ” раҳбари бутун минтақа “хавфли бурилиш нуқтасида” турганидан огоҳлантириб, Исроилнинг Доҳада ХАМАС раҳбариятига қарши уюштирган ҳужуми минтақада вазиятни кескин ўзгартирганини таъкидлаб ўтган.

“Юмшоқ уруш, санкциялар ва “Иброҳим келишувлари“ АҚШ ва Исроил кутган тезкор ва ҳал қилувчи ғалабани таъминлай олмади, шу сабаб улар учун геноцид ечимга айланди”, — дея Қосимнинг сўзларини келтирмоқда Al Jazeera.

Унга кўра, Исроилнинг мақсадлари Фаластиндан ташқари Ливан, Иордания, Миср, Сурия, Ироқ, Саудия Арабистони, Яман ва Эронни ҳам қамраб олади.

Бундан ташқари, Наим Қосим “Ҳизбуллоҳ”нинг қуроллари фақат Исроилга қаратилгани, Саудия Арабистони ёки дунёнинг бошқа ҳеч бир томонига эмаслигини урғулади. Унинг қайд этишича, гуруҳга босим ўтказиш Исроил учун соф ютуқ, “Ҳизбуллоҳ”нинг йўқлиги эса бошқа араб давлатларини ҳам хавф остига қўяди.

• Фаластин
• Isroil
• Мурожаат
• Саудия Арабистони
• hujum