Наманган вилояти Янгиқўрғон туманида 7 ёшли қизга нисбатан 38 ёшли қариндоши томонидан содир этилган жиноят жамоатчиликда кенг муҳокама бўлмоқда. Олий Мажлис депутати “Миллий тикланиш” ДП фракцияси аъзоси Дилноза Азизова ҳам бу воқеага ўз муносабатини билдирди.

Депутат бу ҳолатни системавий муаммо деб атаб, анъанавий юмшоқ жазолар бу турдаги жиноятларнинг олдини олмаслигини таъкидлади.

“Намангандаги воқеа — фақат бир педофилнинг разолати эмас, бу жиноятни йиллар давомида “ахлоқ тузатиш ишлари” деган юмшоқ ифода билан оқлаб келган тизимнинг юзи. Боланинг ҳаёти билан ўйнаш мумкин эмас. Бу фақат жиноят эмас — инсонийликка қарши қўзғолон” — дейди Азизова.

Унга кўра, жазонинг “яхши хулқ” сабабли қисқартирилиши ва жиноятчиларнинг эркин ҳаракатланиши давлатнинг болаларга бўлган муносабатидан дарак. Шу боис депутат қонунчиликда қатъий чораларни мустаҳкамлаш зарурлигини айтар экан, бундай жиноятчиларни кечириш мумкин эмаслигини алоҳида таъкидлаган.

“Менинг талабим қатъий, болаларга нисбатан ҳар қандай жинсий зўравонлик учун умрбод озодликдан маҳрум қилиш жазоси қонун даражасида белгилашнинг вақти келди” — дейди депутат.

Шунингдек, Азизова: “Бола — миллатнинг келажаги деган сўзни кўп айтамиз. Лекин ҳар бир бундай воқеа шу сўзни ёлғонга чиқаряпти. Агар биз ҳали ҳам шундай педофилларга енгил муносабатда бўлсак, демак, келажакни қўлимиз билан йўқ қиляпмиз”— дея ўз фикрларини якунлаган.

• Депутат
• Jazo
• Таклиф
• zo‘ravonlik