Кеча, 18 апрель куни Спорт вазирлиги мажлислар залида ўтказилган навбатдан ташқари конференцияда Ўзбекистон талабалар спорти ассоциациясининг фаолияти кўриб чиқилди.

Конференция давомида мамлакатимизда оммавий спортни ривожлантириш, маҳоратли спортчиларни тайёрлашда талаба-спортчиларнинг ўрни, олийгоҳлардаги мавжуд спорт инфратузилмасининг ҳолати таҳлил этилди.

Билдирилган фикрлар ва таклифлар асосида олий таълим, фан ва инновациялар вазири Қўнғиротбой Шарипов Ўзбекистон талабалар спорти ассоциациясининг раиси этиб сайланди.

Айтиш лозим, Ўзбекистон талабалар спорти ассоциацияси 2018 йилда ташкил этилган. Ўтган давр мобайнида юртимиздаги олий таълим муассасаларида 26 та олимпия спорт тури бўйича 591 та спорт клуби ҳамда 721 та спорт тўгараклари фаолият юритмоқда.

Ўзбекистонда кейинги йилларда жисмоний тарбия ва спортга давлат даражасида эътибор қаратилиши натижасида Талабалар спорт ҳаракати янги босқичга кўтарилди. “Универсиада”, “Баркамол авлод” мусобақалари билан бир қаторда, “Талабалар лигаси”, “Беш ташаббус олимпиадаси”, “Талаба югур” ва “Ректор кубоги” каби оммавий мусобақалар ўтказилиши йўлга қўйилди.

Конференцияда таъкидланганидек, бундан буён барча таълим йўналишларидаги 1-босқич талабалари учун 4 кредитли “Жисмоний тарбия” фани жорий этилади. Спорт клублари ва тўгараклар фаолиятини бошқариш учун ягона рақамли платформа ва мобил илова яратилади. Ягона электрон платформа орқали мусобақалар тақвими, баҳолаш тизими жорий этилади ва бу “Ҳемис” дастурига интеграция қилинади.

Олий таълим муассасаларида фаолият кўрсатаётган ҳар бир спорт тўгараги раҳбарини моддий рағбатлантириш ва талабаларга спорт фаоллиги учун имтиёзлар бериш масалалари ҳам кўриб чиқилади.

• Oliy ta'lim, fan va innovatsiyalar vazirligi
• Тайинлов