2025-йил 18–22 апрел кунлари Тошкент шаҳрининг Олмазор ва Юнусобод туманларининг айрим ҳудудларида электр таъминотида вақтинчалик узилишлар кузатилади. Бу ҳақда “Тошкент шаҳар электр тармоқлари” МЧЖ матбуот хизмати маълум қилди.

Бу ҳолат Л-ДОК-1 ва Л-ДОК-2 юқори кучланишли электр узатиш линияларини модернизация қилиш лойиҳаси доирасида амалга оширилаётган ишлар билан боғлиқ. Эскирган ҳаво тармоқлари замонавий кабел инфратузилмасига алмаштирилади.

Таъмирлаш ишлари мавжуд коммуникация ва электр тармоқларининг жисмоний ва маънавий эскиргани сабабли зарур бўлмоқда. Мутахассислар тавсиясига кўра, бу жараён айнан баҳор фаслига — иссиқ об-ҳаво ва юқори юклама давридан аввалги даврга режалаштирилди. Бу узилишлар аҳоли томонидан нисбатан енгилроқ қабул қилинишига имкон беради.

Олмазор туманида узилишлар қуйидаги маҳаллаларни қамраб олади: “Аҳил”, “Элпарвар”, “Иброҳим ота”, “Гулзор”, “Қорасарой”, “Олтинсой”, “Мояриқ”, “Мискин”. Шунингдек, мазкур ҳудудлардаги улгуржи ва хусусий истеъмолчи обектлар ҳам вақтинчалик электр таъминотидан узилади.

Юнусобод туманида эса узилишлар “Астраобод”, “Туркистон”, “Минг чинор”, “Нурмакон”, “Собиробод”, “Ҳамкоробод”, “Катта Ҳасанбой”, “Шарқ ҳақиқати”, “Регистон”, “Йўлариқ”, “Уч қаҳрамон” маҳаллаларини қамраб олади.
Электр таъминотидаги узилишлар ҳар куни соат 08:00 дан 18:00 гача, яъни тармоқдаги энг паст юклама вақтларида амалга оширилади.

Поликлиника, мактаб, боғча каби ижтимоий соҳа муассасалари кўчма дизел генераторлари орқали барқарор электр энергияси билан таъминланади.

“Тошкент шаҳар электр тармоқлари” МЧЖ вақтинчалик ноқулайликлар учун аҳолимиз ва тадбиркорларимиздан узр сўрайди” – дейилади хабарда.

• Электр энергияси
• Тошкент
• Юнусобод тумани