Ижтимоий тармоқларда тарқалиб, кенг муҳокамаларга сабаб бўлган «Ал-Азхар» ўқув маркази ўқитувчисининг хатти-ҳаракатлари билан боғлиқ ҳолат юзасидан расмий ахборот берилди.

Унга кўра, бугун жиноят ишлари бўйича Шайхонтоҳур туман судида Маъмурий жавобгарлик тўғрисидаги кодекснинг 183-моддаси (майда безорилик) бўйича А. Б. (1977 йилда Тошкент вилоятида туғилган, муқаддам Маъмурий жавобгарлик тўғрисидаги кодекснинг 241-моддаси (диний таълимотдан сабоқ бериш тартибини бузиш) билан маъмурий жавобгарликка тортилган) га нисбатан юритилган маъмурий иш кўриб чиқилган.

Суд мажлисида аниқланишича, ҳуқуқбузар 2023 йил 27 январь куни соат тахминан 9:30 ларда Шайхонтоҳур тумани ҳудудида жойлашган «Ал-Азхар» ўқув маркази биносида бўла туриб, жамиятда юриш туриш қоидаларини қасддан менсимасдан, жамоат тартибини бузиб, фуқаро М. А. ни сўкиб, майда безорилик содир этган.

Жиноят ишлари бўйича Шайхонтоҳур туман судининг 2023 йил 30 январдаги қарори билан А. Б. га Маъмурий жавобгарлик тўғрисидаги кодекснинг 183-моддаси билан 3 сутка маъмурий қамоқ жазоси тайинланган.

Шунингдек, Ўзбекистон мусулмонлар идораси ички назорат комиссияси Тошкент вилояти Тошкент тумани «Эшонхўжа ота» масжиди имом-хатиби А. Б.ни эгаллаб турган лавозимидан озод этиш тўғрисида хулоса қилган.

• Imom-xatib
• МЖтК
• Суд
• Тошкент