Ўзбекистон одам савдосига қарши кураш соҳасида Бирлашган Араб Амирликлари (БАА) билан ҳамкорликни йўлга қўймоқчи, дея хабар берди "Дунё" АА.

Ўзбекистон Бош консуллиги дипломатлари "Дубай аёллар ва болаларни ҳимоя қилиш жамғармаси" бошқарма бошлиғи Фатма Ал Бааж Алмоатасем Белаҳ билан учрашди.

Томонлар одам савдосига оид муаммолар, уларнинг келиб чиқиши сабаблари, бартараф этиш йўллари, ушбу иллатдан жабр кўрганларга зарур консуллик-ҳуқуқий ёрдам кўрсатиш, айбдорларга нисбатан эса қонуниний чора кўриш амалиётлари билан боғлиқ бир қатор долзарб масалалар юзасидан фикр алмашишди.

Фатма Ал Бааж Алмоатасем Белаҳ, ўз навбатида, Ўзбекистоннинг ушбу глобал муоммага қариши кураш бўйича вазифаларини ва натижаларини юқори баҳолади.

"Одам савдосидан жабр кўраётганлар орасида аёллар сони ортиб бораётгани ҳамда трансмиллий жиноятчилик чегара танламаслиги инобатга олиниб, юқоридаги муаммоларни ҳал қилишда халқаро ҳамкорликни янада кенгайтириш муҳим", - деди Фатма Ал Бааж Алмоатасем Белаҳ.

Бўлиб ўтган суҳбат якунида Ўзбекистон Бош консуллиги ва "Дубай аёллар ва болаларни ҳимоя қилиш жамғармаси" ўртасида одам савдоси қурбони бўлган аёллар ҳамда ундан жабр кўрганларни ҳимоя қилиш мақсадида икки томонлама Ҳамкорлик меморандумини ишлаб чиқиш ва имзолаш тўғрисида келишиб олинди.

• БАА
• Ҳамкорлик