Ўзбекистонда креатив индустрия парклари энди ҳудудларда ҳам барпо этилади. Бу ҳақда 14 февраль куни Шавкат Мирзиёевнинг ёшлар билан мулоқоти давомида маълум қилинган.

Президент энди креатив индустрия парклари ҳудудларда ҳам барпо этилишини айтди. Улар зарур ресурс ва инфратузилма билан таъминланади.

Ёшлар билан мулоқот давомида маълум қилинишича, креатив индустрия парки резидентларига 2030 йил якунигача имтиёзли солиқ режими жорий этилади. Бунда ижтимоий ва даромад солиқ ставкалари 50 фоизга камайтирилади, резидентлар товарларни реализация қилиш ҳажмидан қатъи назар айланмадан олинадиган солиқ тўловчилар бўлади.

Парклар негизида креатив соҳа вакилларини ўқитадиган бизнес мактаблари ташкил қилинади. Ушбу мактабларда ёшлар янги ва замонавий бизнес юритиш ҳамда электрон тижорат каби хизмат кўрсатишнинг инновацион усулларини ўрганади.

Мамлакатда креатив иқтисодиёт жадал ривожланаётган бўлиб, соҳада фаолият кўрсатаётганларнинг 98 фоизини ёшлар ташкил этади. Креатив саноат паркларини ривожлантириш учун 2024 йилда 10 миллион доллар йўналтирилган.

Президент 2023 йилда ёшлар ўртасида IT, реклама, кино, архитектура, дизайн, маркетинг, ҳунармандчилик, рассомчилик каби йўналишларга қизиқиш ортиб бораётганини ҳисобга олиб, вилоят ҳокимларига биттадан креатив парк ташкил этишни топширган эди.

Аввалроқ, Тошкент шаҳридаги “Ёшлар ижод саройи”да намунавий креатив парк ташкил қилинган эди.

• Қарор
• Шавкат Мирзиёев
• Янгилик