Кеча, 26 сентябрь куни, Венада Халқаро атом энергияси агентлиги (ХАЭА) йиллик Бош конференциясининг 66-сессияси иш бошлади.

Ушбу тадбирда ташкилотга аъзо 175 мамлакат қаторида Ўзбекистон Республикаси вакиллари ҳам иштирок этмоқда.

Ўзбекистон делегацияси Атом энергетикасини ривожлантириш агентлиги (ЎзАтом), фанлар академияси ва Саноат ҳавфсизлиги давлат қўмитаси вакилларидан таркиб топган.

Қайд этилишича, бош конференция агентликнинг асосий раҳбарлик органи ҳисобланади. Конференция якунида эса ХАЭА фаолиятининг энг асосий масалалари борасида тегишли қарорлар қабул қилинади. Бош конференция доирасида умумий музокаралар ўтказилади ва унда делегация раҳбарлари ўзларининг дастурий чиқишлари билан иштирок этади.

Бош конференция билан бир қаторда ХАЭА доимий равишда ядро технологиялари ва фанга боғлиқ бўлган илмий форумлар ўтказади ва уларнинг барчаси Вена халқаро марказида (ВХМ) бош конференция билан бир вақтда бўлиб ўтади.

Таъкидланишича, Ўзбекистон делегацияси ХАЭА конференциясининг 66-сессиясида ташкилот раҳбарлари, бошқа мамлакатлар делегациялари ва атом энергиясидан тинчлик йўлида фойдаланиш бўйича ҳамкорликни амалга ошириш масаласида масъул бўлган компаниялар билан музокаралар ўтказишни режалаштирган.

• Делегация
• O'zAtom