АҚШ президенти Доналд Трамп Венесуэлага қарашли иккита ҳарбий самолётнинг АҚШ ҳарбий-денгиз кучлари кемаси яқинида учаётганига муносабат билдириб, “Агар улар бизни хавфли вазиятга солиб қўйса, ўша самолётлар уриб туширилади” – деди.

Венесуэла жанговар самолётларининг АҚШ ҳарбий-денгиз кучлари яқинида учаётгани ҳақида қандай фикрдасиз деган саволга Трамп, “Менимча, улар муаммога дуч келишади. Биз уларга шуни айтмоқдамиз. Агар улар хавфли вазиятда учаётган бўлса, капитанларимиз нима қилишни ўзлари ҳал қилади” – деди.

Баҳсда учаётган самолётлар АҚШ учун қанчалик “хавф” туғдиради, деган саволга Трамп “Агар бизни хавфли вазиятга солиб қўйса, ўша самолётлар уриб туширилади”, – деб жавоб берган.

АҚШ Мудофаа вазирлиги (Пентагон) Венесуэланинг иккита ҳарбий самолёти халқаро сувларда АҚШ ҳарбий-денгиз кучлари кемаси яқинида учиб ўтганини маълум қилган.

Баёнотда айтилишича, Венесуэла президенти Николас Мадурога АҚШ ҳарбийлари томонидан олиб борилаётган наркотикларга қарши кураш ва терроризмга қарши операцияларга тўсқинлик қилиш учун ҳеч қандай чора кўрмаслик тавсия қилинган.

• АҚШ
• Венесуэла