"Ўзгидромет" хизмати жорий йилнинг октябрь ойида республика бўйлаб қандай об-ҳаво кузатилишини эълон қилди. Бу йилнинг октябрь ойи ҳам қуруқ ва бироз илиқ об-ҳаво билан бошланади. Ёмғирлар биринчи ўн кунликнинг охирида, шунингдек иккинчи ва учинчи ўн кунликларнинг айрим кунларида кутилмоқда.

Республика ҳудудининг катта қисмида сентябрь ойида ёмғир умуман ёғмади ёки бироз ёғиши кузатилди. Ҳаво ҳарорати 27-32° атрофида, жанубда айрим кунларда 35-39° гача бўлди.

Бу йилнинг октябрь ойи ҳам шундай қуруқ ва бироз илиқ об-ҳаво билан бошланади.

Ойнинг биринчи ҳафтасида асосан ёғингарчиликсиз об-ҳаво бўлиши кутилмоқда. Кечаси ва эрталаб ҳаво ҳарорати 11-16° атрофида бўлган салқинлик ҳис этилади. Кундуз кунлари қуёш нурлари ҳавони 23-28° гача, жанубда баъзи жойларда 30° гача иситади.

Кейинчалик ойнинг охиригача республика ҳудуди бўйича ҳарорат кечалари 10-15° илиқдан 3-8° илиқгача, кундуз кунлари 23-28° дан 13-18° гача ўзгариб туриши кутилмоқда. Қорақалпоғистон Республикаси, Хоразм вилоятида ва Навоий вилоятининг шимолида ойнинг иккинчи ярмида кечаси ва эрталаб ҳавода кузги совуқ ва тупроқда 0-3° совуқгча кузатилиши мумкин. Бундай ҳарорат октябрь ойининг иқлимий меъёрига яқиндир.

Октябрь ойида ёмғирлар биринчи ўн кунликнинг охирида, шунингдек иккинчи ва учинчи ўн кунликларнинг айрим кунларида кутилмоқда.

Иқлимий меъёрларга кўра, Ўзбекистон ҳудудининг катта қисмида ёғингарчилик октябрь ойида 4 кундан 8 кунгача, республиканинг энг чекка жанубида 1 кундан 3 кунгача кузатилади. Ёғингарчилик асосан ёмғир кўринишида бўлади, аммо ҳавода кескин совуқ кузатилганда ёмғир қисқа муддатга қорга айланиши истисно қилинмайди.

Тунги ҳаво ҳароратининг ўртача кўп йиллик қиймати 6-11° илиқни ташкил этади, лекин кўпинча октябрда, айниқса ойнинг иккинчи ярмида биринчи кузги совуқлар кузатилади.

Октябрь ойида кундузги ҳарорат одатда 23-28° илиқдан 10-15° илиқгача ўзгариб туради.

Тошкент учун октябрь ойида минимал ҳарорат рекорди 11,2° совуқни ташкил этади, аммо бу жуда узоқ вақт олдин, ўтган асрнинг бошларида бўлган. Охирги 30 йил ичида Тошкентда минимал ҳарорат 1-2° совуқдан пастга тушмади.

Сўнгги 30 йил ичида Ўзбекистоннинг барча ҳудуди бўйича 2015 йилнинг октябрь ойи энг ёмғир кўп ёғган йил бўлди. Ушбу йилда Тошкентда октябрь ойида ёғингарчилик миқдори меъёридан 3,5 марта кўп бўлди.

• Об-ҳаво
• Тошкент