Олмалиқ кон-металлургия комбинатининг Нодир металлар ва қаттиқ қотишмалар илмий-ишлаб чиқариш бирлашмасида илк бор ферромолибден ишлаб чиқариш технологияси жорий этилди ва тўлиқ ишга туширилди.
Бунда ферромолибден маҳсулоти молибден ишлаб чиқаришда пайдо бўладиган молибден таркибли чиқиндиларни қайта ишлаш асосида олинмоқда.
Айтилишича, Илмий-ишлаб чиқариш бирлашмасида янги технология жорий этилиб, ферромолибденни кукун ҳолатида ишлаб чиқариш орқали унинг юқори сифатли бўлишига эришилди.
“Бунинг асосида ойига 2000 кг ферромолибден ишлаб чиқариш йўлга қўйилиб, 5500 кг ҳажмда Навоий кон-металлургия комбинатига етказиб берилди. Бугунги кунда ички ва ташқи бозорлар, жумладан Япония, Корея Республикаси, Германия, Хитой, Қозоғистон ва Қирғиз Республикаси бозорлари ўрганилмоқда”, – дейилади хабарда.
Қайд этилишича, Илмий-ишлаб чиқариш бирлашмасини 2030 йилга қадар ривожлантириш дастурига мувофиқ 2025 йилга келиб 170 млрд сўм қийматда ферромолибден маҳсулотини ишлаб чиқарилади.
Маълумот учун, ферромолибден 50-70% молибденни ўз ичига олган қотишма ҳисобланади. У зангламайдиган, иссиқликка чидамли, рангли металларнинг оғир қотишмалари, махсус турдаги пўлатларни ишлаб чиқаришда ишлатилади.
Қуйма темирга қўшилганда унинг кучини оширади. Ферромолибден қўшимчалари пўлатнинг хусусиятларини сезиларли даражада яхшилаб, нозик кристалли таркибнинг бир хиллиги, қизиб кетишга қаршилиги ва қаттиқлигини, шунингдек, металларнинг кислотага бардошлигини оширади.
Дунё тажрибасида ферромолибден қум асосига ўрнатилган эритиш мосламасида, куйган молибден концентратидан молибденни металл қайтарувчи восита билан аралашмада юклаш ва эритиш орқали металлотермик усул орқали олинади.
31°
Кечаси 18°
