Кеча, 24 март оқшомида Ўзбекистон миллий терма жамоаси Боливияга, Олимпия терма жамоаси эса Кот-д'Ивуарга қарши ўртоқлик ўйинида иштирок этди.

Саудия Арабистонида ўтказилган учрашув вакилларимизнинг кичик, 1:0 ҳисобидаги ғалабаси билан якунланди. 36-дақиқада Элдор Шомуродов жамоасининг тезкор қарши ҳужумидан кейин юзага келган вазиятни голга айлантирди.

Бу тўп Шомуродовнинг миллий жамоадаги 34-голига айланди.

Шу тариқа, бу борада у Ўзбекистон миллий терма жамоасининг энг яхши тўпурари Максим Шацкихга тенглашиб олди. Кейинги ўринлардан Александр Гейнрих (31 та гол) ва Миржалол Қосимов (30 та гол) жой олган.

Учрашув якунланиши арафасида рақиб футболчиси дарвозабон билан бирга-бир вазиятга чиқиб бораётган Азиз Турғунбоевни тўхтатиб қолгани учун тўғридан тўғри қизил карточка билан жазоланди.

Ўртоқлик ўйини

Ўзбекистон — Боливия 1:0

Гол: 1:0 – 36ʼ Шомуродов.

Четлатиш: Сегредо (90+5).

Қайд этиш мумкин, Сречко Катанец шогирдлари кейинги ўртоқлик ўйинини 28 март куни Венесуэлага қарши ўтказади.

Ўз навбатида, кеча Ўзбекистон Олимпия терма жамоаси Кот-д'Ивуарга қарши ўртоқлик ўйинида майдонга тушди. Томонлар 0:0 ҳисобидаги дурангга имзо чекишди.

• Футбол
• Ўртоқлик ўйини
• Ўзбекистон
• U-23