Бугун, 24 март куни Президент Шавкат Мирзиёев Халқаро инвестиция форуми доирасида Ўзбекистонда амалий ташриф билан бўлиб турган Туркий давлатлар ташкилоти Оқсоқоллар кенгаши раиси, Туркиянинг Адолат ва тараққиёт партияси раисининг ўринбосари Бинали Йилдиримни қабул қилди. Бу ҳақда Президент матбуот хизмати хабар берди.

Қайд этилишича, учрашув аввалида Бинали Йилдирим давлат раҳбарига Туркия Президенти Режеп Таййип Эрдўғаннинг саломини етказган.

Шавкат Мирзиёев Ўзбекистон-Туркия стратегик шериклик муносабатларининг бугунги даражасини мамнуният билан қайд этиб, ўзаро савдо ҳажмлари ортаётгани, замонавий саноатни барпо этиш ва инфратузилмани модернизация қилиш бўйича йирик инвестиция лойиҳалари амалга оширилаётгани ҳамда маданий-гуманитар алоқалар мустаҳкамланаётганини таъкидлаган.

Маълум қилинишича, бугунги кунда Ўзбекистон ва Туркия ўртасидаги Стратегик шериклик бўйича олий даражадаги кенгашнинг навбатдаги йиғилишини ўтказишга фаол тайёргарлик кўрилмоқда.

Шунингдек, Туркий давлатлар ташкилоти доирасидаги ҳамкорлик масалалари ҳам кўриб чиқилган. 2021 йилнинг ноябрь ойида ташкилотнинг Истанбул саммитида эришилган келишувларни амалга оширишга алоҳида эътибор қаратилди.

Бундан ташқари, савдо, транспорт ва логистика, саноат кооперацияси, “яшил” иқтисодиётни ривожлантириш, инновациялар ва юқори технологиялар трансфери каби соҳалардаги қўшма ташаббус-лойиҳалари илгари сурилади.

Қайд этиш мумкин, минтақа кун тартибидаги долзарб масалалар юзасидан ҳам фикрлар алмашилган.
 

• Ўзбекистон
• Шавкат Мирзиёев
• Туркия
• Туркийзабон