“Хитой – Қирғизистон – Ўзбекистон” темирйўли лойиҳасини амалга ошириш учун тузилган қўшма компанияда Ўзбекистон улушининг бир қисмини шакллантириш учун 255 млн доллар ажратилмоқда. 2024 йилнинг ўзида эса 14 млн доллар ажратиши белгиланган.

Ушбу темирйўл “Қашғар – Торугарт – Макмал – Жалолобод – Андижон” йўналиши бўйлаб ўтади.

Ўзбекистон президентининг қарори билан, “Хитой – Қирғизистон – Ўзбекистон” темирйўли лойиҳасини биргаликда амалга ошириш бўйича имзоланган ҳукуматлараро битим тасдиқланди.

Ушбу қарорга кўра, темирйўл қурилиши бўйича қўшма лойиҳа компаниясининг устав капиталидаги Ўзбекистон ҳукумати улушининг бир қисмини шакллантириш учун 255 млн доллар ажратилади.

Шунингдек, ушбу маблағ тикланиш ва тараққиёт жамғармасининг кредити шаклида, 7 йиллик имтиёзли давр билан 15 йил муддатга, йиллик 5 фоиз ставкада “Ўзбекистон темир йўллари” АЖга босқичма-босқич ажратилиши белгиланган.

Бундан ташқари, ушбу лойиҳа учун, қонунчилик ҳужжатларида тақиқланмаган бошқа манбалардан ҳам маблағ йўналтирилиши ҳам қайд этилган.

Бу коридорда товарларни якуний истеъмолчиларга етказиш муддати 7 кунга қисқариши, юк ташиш ҳажми эса йилига 15 миллион тоннагача етиши кўзда тутилган.

• Андижон
• Қирғизистон
• Темир йўл
• Хитой