Қирғизистон Вазирлар Маҳкамаси раиси Одилбек Қосималиев, Ўзбекистон бош вазири Абдулла Арипов ва Тожикистон бош вазири Қоҳир Расулзоданинг уч томонлама учрашуви бўлиб ўтди.

Қирғизистон Вазирлар Маҳкамаси матбуот хизматининг хабар беришича, учрашув уч мамлакат чегаралари туташган жойда – Қирғизистоннинг Баткен вилояти, Ўзбекистоннинг Фарғона вилояти ва Тожикистоннинг Сўғд вилоятида бўлиб ўтган.

Томонлар учрашув уч мамлакат давлат раҳбарлари ўртасида давлат чегаралари масалалари бўйича илгари эришилган келишувлар доирасида ўтказилаётганини таъкидлаган.

Қирғизистон, Тожикистон ва Ўзбекистон бош вазирлари мамлакатлар савдо, логистика, сув-энергетика ва маданий-гуманитар алоқалар каби йўналишларда ҳамкорликни кучайтириш салоҳиятига эга эканини маълум қилган. Уларнинг фикрига кўра, ҳамкорликнинг муҳим таркибий қисми, чегара ва минтақалараро ҳамкорликни ривожлантиришдир.

Бундан ташқари, учрашувда Қирғизистон ва Ўзбекистон ўртасидаги давлат чегарасини делимитация қилиш жараёни якунлангани ҳамда “Қирғизистон-Ўзбекистон давлат чегараси тўғрисида”ги битимга ратификация ёрлиқлари алмашилгани қайд этилган.

• Бош вазир
• Ҳукумат
• Ўзбекистон
• Қирғизистон
• Тожикистон