2026 йил январь–февраль ойларида Ўзбекистонга электромобиллар импорти кескин ўсди. Божхона қўмитаси маълумотларига кўра, икки ой давомида мамлакатга жами 9 698 дона электромобиль олиб кирилган бўлиб, уларнинг умумий қиймати 158,6 миллион долларни ташкил этган.

Бу кўрсаткич ўтган йилнинг шу даври билан таққослаганда бир неча баравар юқори. 2025 йил январь–февраль ойларида Ўзбекистонга 18 миллион долларлик 1 556 дона электромобиль импорт қилинган эди. Натижада жорий йилда электр транспорт воситалари импорти сони қарийб олти бараварга ошгани қайд этилмоқда.

Шу билан бирга, бензинда ҳаракатланувчи автомобиллар импортида ҳам маълум даражада ўсиш кузатилган. Жорий йилнинг дастлабки икки ойида хориждан 55,95 миллион долларлик 2 988 дона бензинли автомобиль харид қилинган. 2025 йилнинг шу даврида эса 55,88 миллион долларлик 2 746 дона машина олиб кирилганди. Бу ҳолатда импорт қилинган автомобиллар сони ошган бўлса-да, умумий қиймат деярли ўзгаришсиз қолган.

Гибрид автомобиллар сегментида эса янада каттароқ ўсиш кузатилган. 2026 йил январь–февраль ойларида Ўзбекистонга 41,2 миллион долларлик 1 249 дона гибрид автомобиль импорт қилинган. Ўтган йилнинг шу даврида бу кўрсаткич анча паст бўлиб, атиги 2,1 миллион долларлик 70 дона гибрид машина олиб кирилган.

Мутахассислар бу тенденцияни мамлакатда экологик тоза транспортга бўлган талаб ортиб бораётгани билан изоҳламоқда. Электромобиллар учун берилаётган имтиёзлар ва инфратузилманинг босқичма-босқич ривожланиши ҳам импорт ҳажмининг ошишига таъсир қилмоқда.

• Божхона
• Электромобил
• Импорт
• статистика